Ajornartoortoqartillugu pinasuartumik ajornartoornermik iliuuseqarfiginninnissaq pillugu ilinniarfeqarfinnit arlaleriarluta apeqquteqarfigineqareersugullu, Qinngornerup sinaakkutai erseqqissartariaqalerpavut. Qinngorneq tassaavoq Kalaallit Nunaanni ilinniartunut tamanut neqeroorut, tassani ilinniartut ilinniagaqarnissamullu qinnuteqartut ataasiakkaatut katsorsarneqarnissamik neqeroorfigineqartarlutik. Utaqqisut allattorsimaffianniittut malillugit katsorsaasartut katsorsaanermik aallartitsisarput, utaqqisullu allattorsimaffiat ilinniartunit qaangiinnarneqarsinnaanngilaq.
Ilisimatitissut Kalaallit Nunaanni ilinniarfeqarfinnut tamanut
AQQUT, Qinngorneq, ajornartoornermi pinasuartumik ikiorsiissutaanngilaq, aamma imaaliortanngilaq: Ajornartoortoqartillugu oqaloqatiginninneq (eqimattanut ataasiakkaanulluunniit), eqqissisitsiniaaneq pisimasulluunniit kingorna eqqartuineq.
Taamaattumik ilinniarfeqarfimmi pinasuartumik ajornartoortoqartillugu ajunaarnersuaqartilluguluunniit (ass. ikuallattoqarpat, nakuusertoqarpat, imminoriaraluartoqarpat/toqutseriartoqarpat assigisaanilluunniit pisoqarpat) Qinngorneq katsorsaasartuvullu attaveqarfigineqassanngillat.
Ilinniarfimmi tamatumunnga assingusumik pisoqassagaluarpat, ilinniarfiit pisortai kommunerisami ajornartoornermii upalungaarsimasunut attaveqarnissaat kajumissaarutigissavarput.
Tassunga ilassutigalugu najukkami ajornartoortoqartillugu upalungaarsimanermut pilersaarusiornissamik ilinniarfeqarfiit tamaasa kajumissaarpavut, ajornartoornerup qanoq iliuuseqarfigineqarnissaanik erseqqissunik malittarisassalimmik, tamatumunnga oqartussaasunut attuumassuteqartunut suleqatiginninnermik isumaqatigiissutit ilanngullugit. (Qinngorneq upalungaarsimanermut pilersaarutinut ilaasinnaanngilaq)
Ilinniartut pinasuartumik ikiorneqarnissaminnik pisariaqartitsilersut ukununnga saaffiginninnissaat kajumissaarutigaarput:
Tusaannga – Meeqqanut, inuusuttunut inersimasunullu oqarasuaatikkut, sms-ikkut chatikkulluunniit ulloq unnuarlu siunnersuisarfiuvoq. Telefon: 80 11 80 imaluunniit SMS: 18 99.
Napparsimmavik, aamma ulloq unnuarlu saaffigineqarsinnaasoq.