Meeqqat ersiutaat qisuariaataallu

Meeqqat inuusuttullu assigiinngillat. Assigiinngitsunik qisuariaateqartarput, ukiui inerisimassusaallu apeqqutaallutik assigiinngitsunik oqariartuuteqartarlutik.

Meeqqat inuusuttullu kinguaassiuutitigut atornerlugaasut qanoq qisuariartarnerannut eqqortunut nalunaarsuiffeqanngilaq. Ataanili ersiutit qisuariaatillu ilaat takuneqarsinnaasarput.

Taamaammat ersiutitut qisuariaatitullu meeqqap takutissinnaasaatut nalunarsukkat tamakkiisuunngillat. Meeraq matumani nalunaarsimanngitsunik qisuariaateqarsinnavoq.

Pissusilersornerup allanngornera

Meeqqap inuusuttulluunniit pissusilersornerata tassanngaannaq allanngornera maluginiaruk. Ass. ammasuulluni iliuuseqarniartuunermiit imal. alapernaatsuunermiit matoqqasunngornermut. Pissusilersornerup tassanngaannaq allanngornera meeqqap inuunerani sakkortuumik pisoqarsimaneranik isumaqarsinnaavoq. Taamaalilluni pissusilersornerata allannguuteqarnera meeqqap toqqissiviilliorneranut ersiutaasinnaavoq. Meeqqat inuusuttullu sivisuumik kinguaassiuutitigut atornerlugaasimasut ilaat, atornerlugaaneq meeqqap ulluinaanut ilaalersimammat, pissusilersornermikkut allannguuteqarnermik takutitsisariaqannginnerat matumani maluginiassavat.

Kinguariarneq

Meeqqat ilaat kinguariarnikkut imal. ineriartornerminni unittoornikkut toqqissiviillutik qisuariartarput. Taanna ass. meeraaqqatut oqalulernikkut imal. perusuersarfiliarsinnaagaluarluni siniffimmi/qarlinnut quinikkut pisinnaavoq.

Inummik aalajangersimasumik iluarinngisaqarneq

Meeqqat inersimasumik imal. inummik aalajangersimasumik ilaqarnissamut akerliusinnaapput piumassuseqannginnermilluunniit takutitisinnaallutik.

Kinguaassiuutitigut ernumanaatilimmik pissusilersorneq

Meeqqaat inuusuttullu kinguaassiuutinut tunngatillugu pissusilersornerat inersimasut atoqatigiittarnerattut pissuseqalerpat, ass. meeqqap ukiuinut naleqqutinngitsumik kinguaasiutinut tunngasunik pissusilersorpat, pissusissamisuunngilaq inersimasullu akulerunnissaat akisussaaffigaat. Meeqqap meeraqammi inersimasulluunniit kinguaassiuutitigut killissaa qaangerpagu tamanna pissusissamisuunngilaq. Meeraq ingasaassamik kinguaassiuutitigut imminut inertinniarsarisarpat ass. pinngitsaalinertut
ittumik tissarsartarpat/kinguaassiuutimik tagiartuisarpat, qisuariarfigisariaqarpoq. Meeraq taama ukiulinni nalinginnaanngitsumik atoqatigiinnermik kinguaassiuutitigullu iliuutsinik eqqartuisarpat maluginiaanerunissamut tunngavissaqarpoq.

Tassanngaannaq qissasertarneq

Meeqqat amerlasuut kinguaassiuutitigut atornerlugaasut oqaloqatissaqanngittutut misisarput. Innarlerneqarsimanermi misigissutsit oqaasinngorsinnaanngikkaanngamikkit tassanngaannaq qissasernermik takutitsisinnaasarput.

Sinissaaleqineq sinnattupilunnerlu

Sinissaaleqineq sinnattupilunnerlu nalinginnaasumit akulikinneruppata immaqalu qisuariaataasinnaasunik allanik ilaqarlutik, immikkut maluginiaanissaq tunngavissaqarpoq.

Nikallunganeq

Meeqqat kinguaassiuutitigut atornerlugaanerup kingorna aliasuttuarneq, kisimiittutut misigisimaneq soriarsinnaannginnerlu misigisinnaavaat.

Kamassarneq aallaamanerlu

Meeqqat ilaat sakkortuumik pissusilersulersarput. Tamanna tassaasinnaavoq kamarujussuarneq imal. meeqqanik inersimasunillu saassussineq. Meeqqat allat aallaamasarput suullu tamaasa sukkasoorujussuarmik ingerlattarlugit.

Ukkassilluarsinnaannginneq

Meeqqat ilaasa suliamik pinnguaammilluunniit ataatsimik ukkassisinnaaneq ajornartorsiutigisarpaat. Ataatsimut isiginnissinnaanertik annaagajuppaat, kamajapput puigulertorsinnaasarlutillu.

Imminut ajoquserniartuuneq imminut toqunnissamik eqqarsarneq – imminullu toqoriarneq

Meeqqat imminnut kilertitersinnaasarput, uutarsinnaasarput allatulluunniit imminnut ajoqusersinnaasarput. Imminut toqunnissaq eqqarsataasinnaavoq imminullu toqoriartoqarsinnaalluni.

Imminut naleqartinnginneq, ikiorfeqannginneq sorusussuseqannginnerluunniit

Meeqqat imminnut upperiunnaarsinnaapput naleqartutullu misiginatik.

Oqalukkumannginneq

Meeqqat nipaatsutut pissuseqarsinnaapput allanullu akuliukkumassanatik. Tamanna kinguaassiuutitigut atornerlugaanerup isertuuteqquneqarneranik imal. oqaluttuarpata kinguneqartinneqarnissaanik sioorasaarneqarsimanermik patsiseqarsinnaavoq.

Timikkut ersiutit

Meeraq timimigut ersiuteqarpat soorlu tilluusaqarpat, qanermi eqqaagut kimillanneqarpat qanermigulluunniit ajoqusersimappat, kinguaassiuutiminiit aniasoqarpat, kinguaassiuutimigut anniarpat, atoqatigiinnikkut tuniluuttumik nappaateqarpat assigisaannilluunniit ersiuteqarpat, ernumanissaq tunngavissaqarpoq.

Naarlunneq niaqorlunnerlu

Meeqqat amerlasuut tarnikkut nanertuutit timinut sunniutaannik inuunerliornerannut takutitsisunik ersiuteqalersarput. Taakku tassaasinnaapput naarlunneq, niaqorlunneq timilluunniit ilaagut allakkut anniarneq. Tarnikkut nanertuutit timikkut ersiutaat nassuiarneqarsinnaasanngillat.

Eqqiluisaarnermut tunngatillugu maluginiangitsuugassaanngitsoq

Meeqqat ilaat aamma eqqiluisaanngitsutut isikkoqarsinnaapput, ipertuunik atisaqarlutik asattoqqunatik/uffarumanatik. Akerlianillu meeqqat ilaat aamma ingasattajaartumik asattorusussuseqarsinnaapput.

Tarnikkut nappaateqarnikkut nerinermut tunngatillugu akornuteqarneq

Meeqqat ilaat nerinermut tunngatillugu akornuteqarsinnaapput soorlu anoreksi (imminut kaatsinneq) imal. bulimi (nererujussuarneq naggataagullu meriarneq).

Amigaatilimmik ingasaassamilluunniit kannguttassuseqarneq

Meeqqat ilaasa timertik ass. angigisaminnik atisalersorlutik toqortorniarsarisarpaat. Akerlianik meeqqat ilaat malunnavissumik peqqusaarpasittumik atisalersortarput.

Ersiutit qisuariaatillu assigiinngitsut kinguaassiuutitigut atornerluinerinnarmi atuutinngillat. Qisuariaatsit meeqqap inuunerani pissutsit assigiinngitsut tunngavigalugit pilersimasinnaasut, nalinginnaasumik inuunerliornermut ersiutaasinnaapput.

Taamaammat suut meeqqap inuunerissusaanut sunniuteqarsinnaanerisa (ass. ulluunerani paaqqinnittarfik, klubbimi avatangiisit, angerlarsimaffik, ikinngutit, ineriartorneq assigisaallu) isumaliutiginissaat pingaaruteqarpoq.

Ersiutinik qisuariaatinillu ernumanaatilinnik malugisaqaraanni, taakku allattortariaqarput aqutsisorisamullu immaqalu suleqatinut oqaatigalugit. Meeqqap aamma nalinginnaanerusumik qanoq innera pillugu oqaluunnissaa isumassarsiatsialaagajussaaq.

Piffissap ingerlanerani meeqqap qanoq innera malittariniarlugu piffissaq aaqqissugaanerusoq – immaqalu meeqqap pisuni assigiinngitsuni ass. pinngitsaalineqartutut misigigaangami qanoq qisuariartarneranik maluginiaaneq aallartinneqarsinnaavoq.

Meeraq ilisarisimalluanngisat imal. ullut tamaasa attaviginngisat ernumassutigilerukku, paasissutissat taakku – ass. suleqatinut allanut meeqqamik ilisarisimannittunut imal. suliffiup aqutsisuinut ingerlateqqinnissaat pingaaruteqarpoq.