Kinguaassiuutitigut atornerluineq pineqaraangat oqaatsit assigiingitsorpassuit atorneqartarput, ass. qanigisamit atoqatigineqarneq, kinguaassiuutitigut kannguttaatsuliorneq, kinguaassiuutitigut atornerluineq, nakuuserneq sakkugalugu atoqateqarneq.
Uagut kinguaassiuutitigut atornerluineq kinguaassiuutitigut sammisanut meeqqanut tunngasunut sunulluunniit ataatsimut taaguutitut atorparput.
Kinguaassiuutitigut atornerluineq sunaana?
Kinguaassiuutitigut atornerluinerit ima nassuiarpagut:
Kinguaassiuutitigut atornerluinerit tassaapput iliuuserisat timi atorlugu atornaguluunniit meeqqap inuusuttulluunniit paasisinnaanngisai imal. paatsuugai meeqqallu inerisimassutsikkut akuerisinnaanngisai.
Kinguaassiuutitigut atornerluinermi meeqqap inersimasumut atornerluisumut tatiginninnera atornerlunneqartarpoq meeqqallu naleqassusaa innarlerneqarluni.
Kinguaassiuutitigut atornerluineq tassaavoq atornerluisup pisariaqartitaa piumasaalu. Allatut oqaatigalugu kinguaasiuutitigut atornerluineq tassaavoq iliuuserisaq sammisarluunniit kinguaassiuutinut tunngasoq sunaluunniit atornerlunneqartup killissaanik qaangiisoq.
Timi atorlugu atornagulu kinguaassiuutitigut atornerluineq
Kinguaassiuutitigut atornerluinerit ilaatigut timeq atorneq ajorpaat ass. kinguaassiuutitigut sammisaqarnissamut kaammattuineq, pornonik isiginnaartitaaneq, kannguttaatsuliortup pisariaqartitaanik sunniisumik assilisinneq filmiliaritinnerluunniit, inuusutumik inersimasumilluunniit tissassartumik imminulluunniit kinguaassiuutitigut pissusilersorluni attuualaartumik isiginnaarneq, inuusuttumik inersimasumilluunniit atisaqarani takutittumik isiginnaarneq.
Taamaattut timi atornagu kinguaassiuutitigut atornerluinernik taasarpavut.
Kinguaassiuutitigut atornerluinerit allat timi atorlugu ass. kuninneqarnikkut, kinguaassiuutitigut pissusilersorluni misigissutsinik takutitsinikkut, atisaajarneqarnikkut, kanngutaatsuliortup kinguaassiuutaanik attuinikkut, nammineq atisaqarani atisaqarluniluunniit attualaarneqarnikkut, kinguaassiuutitigut, itikkut qanikkulluunniit pulallugu pinngitsaaliniarneqarnikkut ingerlanneqartarput.
Taamaattut timi atorlugu kinguaassiuutitigut atornerluinertut taasarpavut.