Kinguaassiuutitigut killissamik qaangiisoqarsimatillugu immikkut ilinniagalinnut ilitsersuut

Immikkut ilinniagalittut (perorsaasutut, ilinniartitsisutut, terapeutitut, isumaginninnermi siunnersortitut, ikiortitut, peqqissaasutut il.il.) kinguaassiuutitigut killissamik qaangiisoqarsimatillugu ajornakusoorsinnaasarpoq qanoq iliuuseqarnissamik nalilersuinissaq.

Uani atuarsinnaavat kinguaassiuutitigut killissamik qaangiisoqarsimatillugu pasitsaassisoqarsimatilluguluunniit qanoq iliuuseqarnissamut ilitsersuut. Tamatta ilisimasaqalerutta meeqqap ineriartornera peqqissusaaluunniit navianartorsiortinneqartoq pisussaaffigaarput inunnik isumaginnittoqarfimmut nalunaaruteqassalluta, takuuk nalunaaruteqarnissamut sakkortusisamik pisussaaffeqarnerput.

Siunnersorneqarnissaq pisariaqartippiuk?

Qitiusumik siunnersuisarfiup meeqqanik inuusuttunillu 0-18-inik ukiulinnik sullissisunut immikkut ilinniagalinnut siunnersuinissaq neqeroorutigaa.

Nalornissuteqaruit Qitiusumik siunnersuisarfik tamatigut attavigiuk.

Killissamik qaangiisoqarneranik pasitsaassisoqartillugu

Pasitsaassisoqarsimatillugu pingaartuuvoq illit immikkut ilinniagalittut piffissami killilimmi meeraq malittarissagit meeqqallu pissusilersornera allaaseralugu. Pisortat tamanna pillugu oqaloqatigiuk. Inunnik isumaginnittoqarfimmiut meeqqap atugaanik misissuinerminni allattukkatit atorsinnaavaat. Eqqaamajuk: Meeraq qanoq inneranik atugarissaarneranillu apersulaarsinnaavat, meerarli oqartinniarsarissanngilat apeqqarissaarfiginaguluunniit. Politiit taakkuupput meeqqamik killisiuisussat.
Inunnik isumaginnittoqarfimmut nalunaarusiorit. Inunnik isumaginnittoqarfiup nalilersussavaa pasitsaassineq tunngavissaqarnersoq aammalu politiinut unnerluutiginnissanerlutik. Pisortat qulakkiissavaat meeqqap kinguaasiutitigut killissamik qaangiiffigineqarneranik unitsitsinissaq.
Inunnik isumaginnittoqarfiup, politiit peqqinnissaqarfiulluunniit Kommuni attavigissavaat. Taakkua suleqatigiillutik ataatsimoorullugu iliuusissat peqatigiillutik suliarissavaat. Kommuni assigiinngitsunik sulialinnut meeqqamut iliuusissanik ataqatigiissaarisuussaaq.

Kinguaassiuutitigut killissamik qaangiisoqarsimatillugu

Inunnik isumaginnittoqarfimmut nalunaarusiorit. Inunnik isumaginnittoqarfiup killissamik qaangiiffiginnissimaneq politiinut unnerluutigissavaa. Politiit aamma killissamik qaangiisoqarsimatillugu saaffigineqarsimasinnaapput, taakkua aamma inunnik isumaginnittoqarfimmut nalunaaruteqassapput. Peqqinnissaqarfik killissamik qaangiisoqarsimatillugu ilisimasaqaleruni inunnik isumaginnittoqarfimmut nalunaaruteqassaaq aamma/imaluunniit politiinut unnerluutiginnissaaq.
Inunnik isumaginnittoqarfiup meeqqap peqqissusaa atugarissaarneralu misissuiffigalugu allartissavaa. Nalilersorneqassaaq qanoq iliuuseqarnikkut meeraq ikiorserneqassanersoq.
Inunnik isumaginnittoqarfiup, politiit imaluunniit peqqinnissaqarfiup Kommuni attavigissavaat. Pineqartut suleqatigiillutik iliuusissat ataatsimoorussat nassaariniassavaat. Kommuni meeqqamut iliuusissanik assigiinngitsunik sulialinnut ataqatigiissaarisuussaaq.